ang apendiks o apendise, na tinatawag ding beripormang apendiks, apendiks ng sekum, apendiseng pansekum, o bermiks (kilala sa Ingles bilang vermiform appendix, cecal appendix, caecal appendix, o vermix) ay isang tubong walang butas ang isang dulo na nakaugnay sa sekum (ang cecum o caecum sa Ingles, na tinatawag ding "tokong" bagamang ang tokong ay pantawag din sa duodenum), kung saan umuunlad ito mula sa embriyo (bilig). Ang tokong ay isang kayariang parang supot ng kolon (colon) o ng malaking isaw). Ang apendiks ay nasa malapit sa pinagtagpuan o hugpungan (dugtungan) ng maliit na bituka at ng malaking bituka. Ang salitang "beriporme" o vermiform ay nagbuhat sa Latin na may kahulugang "hugis bulati", kaya't ang beripormang apendiks" ay may kahulugang "hugis bulating apendiks".